Kato Pasambahan Adat

PIDATO MANJAPUIK MARAPULAI

Ujuang :Maa baliau datuak...     

Pangka :
Manitahlah, Datuak...

Ujuang :
Iko mah sambah nan ka dipulangkan ka bakeh Datuak, sungguehpun Datuak surang nan dihadang dengan sambah, disabuikkan namo bapujikan gala, ka nan rapek juo molah sagalo datuek nan baranam, tuan alim nan baranam, taruih ka tuanku nan baduo. Jikok di ambo indak ka taratok tabilang, tasabuik namo tapuji gala surang-surang, melainkan sambah ambo sambah data. Sambah ambo sambah data, dari ujuang taruih ka pangka, dari tangah lalu ka tapi, nan salirik bandue di tapi, nan salerong bandue di tangah, dan tasungkuik diatok nan talingka di dindiang, nan taambin di lantai nan saisi rumah tanggo nangko, ka tampek nyo ambo maantakan sambah, ka bakeh Datuak juo pulangnyo sambah ambo, mah Datuak .....
Pangka :
Ka nan basamo kumbalinyo, mah Datuak....

Ujuang :
Iko mah sambah nan ka ambo pulangkan ka bakeh Datuak, sabarih molah kadatangan kami nangko, baik mandeh sarato kakak, nan dilapeh diujo dek niniek mamak pasukuan malayu. pai maliek janji nan arek, managuhi sapanjang nan pusako. Gadang nan ba kabasaran, gadang marapulai dek bajapuik. baa sawajah kini nangko, iyo ka manjapuik marapulai molah namonyo, sarato karik jo kabienyo, nan di kanduang adek jo pusako, nan bak tuo mairiangkan basamo-samo. Kok kandak iyo nak dibari, pintak iyo nak dipalakukan. Baitu titah nan kami bao, mah Datuak .....

Pangka :
Lah ukua sampai dek Datuak....

Ujuang :
Bilang sakiro itulah, Datuak...

Pangka :
Bana pulo tumah sapanjang panitahan Datuak tadi, jikok didanga lah elok bunyi, jikok dipandang lah elok rupo. Tapi samantang pun baitu, nan bak ibaraik buruang pipik, babondoang hilie jo mudiek, malayok kiri jo kanan, panek malayok nyo malayang, pueh maninggi nyo marandah, hinggok di padang ribu-ribu. Satibo nyo di sinan, gilo mamakan buah rumpuik, litak lapeh hauih pun tibo, diminum ambun nan sa titiek, sajuak anggoto ka tujuehnyo, sabab lah sudah minum jo makan. manjalang kapak ka dikirai, malakik kaki basitumpu, manuju pinang nan sabatang, pulang ka asa mulo tabang, diwalakkan kalam sakutiko, mananti Datuak samantaro, mah Datuak ...

Ujuang :
Basaba kami mananti, mah Datuak...

... Sipangka barundiang jo Bapak dan Mamak si marapulai ...

Pangka :
Baliau Bapak, Bapak .... (Bapak si Marapulai)

Bapak :
Manitahlah....

Pangka :
Ikomah sambah nan ka ambo pulangkan ka bakeh Bapak, lah tibo pulo olak-olai dari pihak alek jamu nan datang. Gadang nan ba kabasaran, gadang Marapulai dek bajapuik. Kato alah bajawab tapi gayuang alun lai basambuik, ka pambarinyo, iko nan ambo japuik-an ka bakeh Bapak, mah Bapak....

Bapak :
Lah sampai, Datuak.....

Pangka :
Bilang sakiro itu, Bapak ....

Bapak :
Bana pulo tumah sapanjang panitahan Datuak, lai di barih lakek paek, lah di rasuak manjariau. Pintak biaso buliah kandak biaso balaku. Kami di pihak bapak, sarato jo induak bakonyo, iyo ka dilapeh jo muko nan janiah, jo hati nan suci, mah Datuak...

Pangka :
Lah sampai dek Bapak...

Bapak :
Bilang sakiro alah.

Pangka :
Indak lai doh, lah dapek pulo ambo aia nan bak satitiak, rantiang nan bak sasakah, lah baiak manyanang ati ambo. Limbago hujan nan barasa paneh nan bapuhun, ambo antaan rundiang ka asanyo, mah Bapak ....

Bapak :
Baitu molah sutan....

Pangka :
Maa baliau Mamak... (Ninik mamak di pihak si Pangka)

Mamak :
Manitahlah...

Pangka :
Ikomah rundingan nan ka disampaikan ka bakeh Mamak, ateh kadatangan alek jamu kito, iyo gadang nan ba kabasaran, gadang marapulai dek bajapuik, manjapuik marapulai malah kanamonyo. Sabarik titah nan dari pihak bapak sarato induak bako marapulai, ka dilapeh jo muko nan janiah, jo hati nan suci. Kok lai ka tukuak tambahnyo, iko nan ambo japuik-an ka bakeh Mamak, mah Mak Datuak...

Mamak :
Lah sampai, Sutan...

Pangka :
Bilang sakiro itu mak Datuak....

Mamak :
Jikok baitu pintak jo pinto alek nan datang, itulah kato sabananyo. Namun samantang pun baitu, ibaraik ayam ka basabuang, iyo bausok babari makan bana dulu andaknyo, mah Sutan...

Pangka :
Alah sampai, mak Datuak ...

Mamak :
Alah...

Pangka :
Dang dikatokan lah dapek ambo air nan bak satitiak, rantiang nan bak sasakah, barupo kato nan sapatah, lah baiak manyanang hari ambo. Baa toh nyo kini, gayuang ambo antaan ka balabeh, rundiangan ambo pulangkan ka asanyo, mah mak Datuak...

Mamak :
Baitu molah...

... rundingan di kumbalikan ka pihak nan di ujuang ...
Pangka :
Maa baliau Datuak...

Ujuang :
Lalukan lah Datuak ...

Pangka :
Tinggi batang lamo kok lareh, jauah jalan lamo kok sampai, gak talalai ambo mamulangkan kato, rila jo maaf ambo mohonkan. Sapanjang panitahan Datuak nan ka tangah, tibo di ambo indak kabaulang kili batikam jajak. Diulang kili kok nyo sipi, batikam jajak kok nyo cupu, diulang kato kok batimbang. Ujuang nyo sajo ambo ambiek. Apolah nan manjadi ujuang panitahan tadi, gadang nan ba kabasaran, gadang mapaulai dek bajapuik, kan iyo baitu bana ujuang panitahan Datuak tadi?

Ujuang :
Sabananyo tumah, Datuak ...

Pangka :
Jikok baitu, satitiak dari Datuak lah ambo lawikkan, sakapa lah ambo gunuangkan, sasakah ranting nak manjadi batang, batang nan elok ka sandaran. Lah ambo bao kato baiyo, jalan bamoah jo baliau di pihak Bapak sarato induak bakonyo. Taruih ka ninik mamak sarato karik jo kabianyo. Buleklah aia dek pambuluah, bulek jantuang dek kalupak, bulek kato jo mufakaik. Bulek lah bulieh digoloangkan, picak lah buliah dilayangkan. Jikok kandak lai

PIDATO MAANTAAN MARAPULAI

Sutan Sinaro  :

(Dari kaum laki laki) Manitah kapado niniak mamak kaum perempuan..... Maa mak datuak Putiah, kamanitah jo mamak...

Datuak putiah :

(Niniak mamak kaum perempuan) ...laiSutan Sinaro, manitah lah....

Sutan Sinaro:

Sungguah mak datuak nan disambah, tagah dek adat jo pusako, dek barih cupak jo gantang, batinnyo kapado sagalo niniak jo mamak. Karajo nan bapokok, silang nan bapangka. Adopun panitahan nan ditibokan pado mamak, pihak dikami nan datang, salangkah turun dari janjang, dari tanggo rumah kampuang kami, barih tabantang kami turuik, labuah nan gadang kami tampauh masuak ka jorong kampuang nangko. Kok tibo alah baduduakan, lah tarunjak siriah dicarano, tando lah sudah minum jo makan. Pihak didiri marapulai, lah duduak diateh rumah. Dilingkuang niniak jo mamak, dihadapan ibu jo bapak sarato ipa parabisan. Kok tumbuah ditangah rumah, kajadi adat bijo nan baiak, katungkek pamani jalan, kakarih pamaga diri, kok elok ratak tangannyo, panjang bao pangarek, singkek bao kamauleh, senteng bao kapambilai. Kok elok ratak lidahnyo, kusuik bao kamanyalasai, karuah dapek mampajaniah. Tapi samantangpun baitu, pihak diri marapulai, raso manetek niro pinang, antah baraie antah tidak, nan bak alu patah batimpo, musim pabilo kabaturak. Ibo nan bak padi salibu, awak tumbuah musim talampau, urek tagantuang kajarami, rangkiang tinggi nan dicinto. Hanyo sabuah pintak kami supayo ditarimo di mamak datuak elok elok, iyo didalam tapak tangan, ikolah sambah nan ditibokan ka mak datuak 

Datuak Putiah :

Lah sampai tu di sutan

Sutan Sinaro :

Alah mak datuak

Datuak Sati :

Panitahan sutan nan taanta kapado ambo, lompek dibari basitumpu, sambah tarapak batujuan, batinnyo kapado niniak jo mamak Karajo nan bapokok, silang nan bapangka. Adopun panitahan nan ditibokan pado mamak, pihak dikami nan datang, salangkah turun dari janjang, dari tanggo rumah kampuang kami, barih tabantang kami turuik, labuah nan gadang kami tampauh masuak ka jorong kampuang nangko.

Kok tibo alah baduduakan, lah tarunjak siriah dicarano, tando lah sudah minum jo makan. Pihak didiri marapulai, lah duduak diateh rumah. Dilingkuang niniak jo mamak, dihadapan ibu jo bapak sarato ipa parabisan. Kok tumbuah ditangah rumah, kajadi adat bijo nan baiak, katungkek pamani jalan, kakarih pamaga diri, kok elok ratak tangannyo, panjang bao pangarek, singkek bao kamauleh, senteng bao kapambilai. Kok elok ratak lidahnyo, kusuik bao kamanyalasai, karuah dapek mampajaniah. Tapi samantangpun baitu, pihak diri marapulai, raso manetek niro pinang, antah baraie antah tidak, nan bak alu patah batimpo, musim pabilo kabaturak. Ibo nan bak padi salibu, awak tumbuah musim talampau, urek tagantuang kajarami, rangkiang tinggi nan dicinto. sabuah pintak dari sutan supayo batarimo elok elok, iyo didalam tapak tangan,kan baitu lalunyo di Sutan

Sutan Sinaro :

Iyo baitu bana lalunyo mak datuak

Datuak Sati :

Panitahan Sutan nantun , alah diadat nan bapakai, alah talingka di pusako. Sungguahpun nan baitu, karano lai dihadapan niniak mamak nan basamo, ambo ambiak kato baiyo, mananti sutan sakutiko, kan lai didalam adat tu Sutan..?

Sutan Sinaro :

Alah didalam adat tu mak Datuak, mananti lah ambo

Datuak Putiah :

(Baiyo kamambari jo niniak mamak lain), dan mangumbalikan, ma....  Sutan Sinaro, kumbali panitahan pada Sutan Sinaro. Nan sapanjang kato Sutan, iyolah kato sabananyo, satantang diri marapulai, alah rancak ditimpo baiak, basi baiak diringgiti, alah talatak didalam adat, alahnyo duduak di pusako. Anak ciek lah jadi duo, tampaiak baiyo jo batido, alah ditarimo elok-elok. Itulah nan kajadi barinyo di ambo pado Sutan.

Sutan Sinaro :

Lah sampai di mak Datuak ..?

Datuak Putiah :

Alah Sutan

Sutan Sinaro :

Sapanjang pambarian mak Datuak, rundiang nan alah kami danga, rupo nan alah kami liek. Satantang diri marapulai, alah rancak ditimpo baiak, basi baiak diringgiti, alah talatak didalam adat, alahnyo duduak di pusako. Anak ciek lah jadi duo, tampaiak baiyo jo batido, alah ditarimo elok-elok.kan baitu barinyo tadi di mak Datuak.

Datuak Putiah :

Iyo baitu bana Sutan

Sutan Sinaro :

Karano pintak alah buliah kandak alah balaku, Alhamdulillah kajawabnyo mak Datuak.

Datuak Putiah :

Sutan kato Alhamdulillah, panitahan bateh kito lai Sutan

Sutan Sinaro :

Sakiro-kiro  babateh dulu mak datuak. (Sutan Sinaro baiyo jo sialek untuak manitah kapulang )

Maa malin mudo, kamanitah jo Malin.

Malin Mudo :

(Sipangka) Lai Sutan Sinaro manitah lah.

Sutan Sinaro :

Sungguahpun Malin nan dihimbau, lompek dibari basitumpu, batinnyo kapado niniak jo mamak, karajo nan bapokok, silang nan bapangka. Panitahan nan ditibokan pado Malin, dihari nan bak kini, nan dimukasuik alah sampai, nan diama alah pacah, kok satantang minum jo makan, minum  alah ubek auih, makan alah ubek litak, Alhamdulillah kabarinyo. baa lai diateh nantun, Bulek lah sagiliang, pipih alah satapiak dek niniak jo mamak, sarato sarato sudaro nan datang, bak ibarat urangmanyumpik: Kapeh tabang mambao angin, panulak damak kalua, damak lah rintang didaun, kumbang lah rintang dibungo, buruang lah rintang dibuah, kapeh nak babaliak katanah, ikolah bana dianta bakeh Malin.

Malin Mudo :
a pulo nan manjadi kato di Sutan ka ambo,   batinnyo kapado niniak jo mamak, karajo nan bapokok, silang nan bapangka. Panitahan nan ditibokan pado Malin, dihari nan bak kini, nan dimukasuik alah sampai, nan diama alah pacah, kok satantang minum jo makan, minum  alah ubek auih, makan alah ubek litak, Alhamdulillah kabarinyo. Baa lai diateh nantun, bulek lah sagiliang, pipih alah satapiak dek niniak jo mamak, sarato sarato sudaro nan datang, bak ibarat urang manyumpik: Kapeh tabang mambao angin, panulak damak kalua, damak lah rintang didaun, kumbang lah rintang dibungo, buruang lah rintang dibuah, kapeh nak babaliak katanah, kan baitu lalunyo di Sutan..?

Sutan Sinaro :

Iyo baitu bana lalunyo Malin.

Malin Mudo :

Buah panitahan Sutan tadi, alah taracak diadat, alah talingka di pusako, tapi karano lai pulo nan manuruik  undang, bakato baiyo bajalan baamuah, ambo bao kato jo mupakat, kapado niniak mamak, karajo nan bapokok, silang nan bapangka, mananti Sutan sakutiko, kan lai didalam adat tu sutan.

Sutan Sinaro:

Iyo lah tibo bana nan baitu nan diadatkan Malin, mananti malah ambo

Malin Mudo :

(Mupakat jo niniak mamak, mamak nan pangka)...... maa mak Datuak Putiah, kabarundiang jo mamak...

Datuak Putiah :

Lai Malin laluanlah...

Malin Mudo  :

Nan kajadi parundiangan jo mamak, kok bunyi lah samo didanga, nan kabarinyo ambo japuikan ka mamak Datuak

Datuak Putiah :

Samo samalam sajolah kito disiko. Malin

Malin Mudo :

Maa Sutan Sinaro, panitahan kumbali pado Sutan

Sutan Sinaro:  Lai Malin

Malin Mudo :

Dimaso cako Sutan mananti, ambo manjapuikan nan kabarinyo kapado niniak jo mamak, karajo nan bapokok, silang nan bapangka. Nan kabarinyo dibaliau, manuruik pasa nan biaso, rumah dibuek tampaik bamalam, sumua dikali tampaik mandi, kayu gadang tampaik balinduang. Iyo mamintak karajo nan bapokok, silang nan bapangka, samo samo bamalamlah kito disiko. Ikolah nan kabuah barinyo pado Sutan.

Sutan Sinaro ;

  Dimaso nan cako ambo mananti , Malin manjapuikan nan kabarinyo kapado niniak jo mamak, karajo nan bapokok, silang nan bapangka. Nan kabarinyo dibaliau, manuruik pasa nan biaso, rumah dibuek tampaik bamalam, sumua dikali tampaik mandi, kayu gadang tampaik balinduang. Iyo mamintak karajo nan bapokok, silang nan bapangka, samo samo bamalamlah kito disiko. Kan baitu barinyo di Malin.

Malin Mudo : Iyo baitu bana Sutan.

Sutan Sinaro :

Sabanyak rundiangan Malin nan katangah, alah manuruik alua jo patuik. Tapi sungguahpun baitu. Karano rumah gadang lai duo tigo, bamalam bana kami disiko, tantu nan ciek katingga pulo. Ikolah saboknyo, mangko kami mamintak juo, dilapeh jo hati nan suci. Itulah bana dijamboan bakeh Malin

Malin Mudo;

Sabanyak pambarian Sutan nan katangah alah dirasuak manjariau, alah dilaie lakek atok. Tapi sungguahpun baitu, mangko tabik juo kabanaran dikami, hari kalam bulan kok kabua, dihilie jalan kok runtuah, dimudiak jalan kok taban, kami maanta tak saleso. Kok ado maro malintang, tantu nan pangka kaberatan, ikolah mangko nak mamintak juo malam disiko. Sakian bana dianta bakeh sutan.

Sutan Sinaro ;

A pulo nan manjadi pambarian di Malin cako, hari kalam bulan kok kabua, dihilie jalan kok runtuah, dimudiak jalan kok taban. Kok tumbuah maro malintang, nan pangka maanta tak saleso. Kan baitu lalunyo di Malin

Malin Mudo :

Iyo baitu bana, sutan



Sutan Sinaro :

Sapanjang pambarian Malin, alah manuruik pasa nan biaso. Tapi mangko manjadi parmintaan juo bagi kami, karano dihilie jalan lai luruih, dimudiak jalan lai pasa, kok ado bana maro nan malintang, kami sairiang lai basamo. Nak lapeh juo lah kami jo hati nan suci jo muko nan janiah. Ikolah bana nan dijapuikan juo bakeh Malin

Malin Mudo :

Maa.. Sutan Sinaro, ruponyo ciek di ambo panahan, duo di Sutan Sinaro pambarinyo, mako nak ambo bao baliak bakato baiyo bajalan baamuah, kapado niniak mamak, karajo nan bapokok, silang nan bapangka, mananti Sutan sakutiko, kan lai bana nan baitu Sutan.

Sutan Sinaro :

Asa lai pintak kabuliah, kandak  kabalaku, mananti malah ambo Malin...

Malin Mudo :

Maa mamak Datuak Putiah , kabarundiang baliak jo mamak.

Datuak Putiah : Rancak Malin laluanlah..

Malin Mudo :

Nan kajadi rundiangan jo mamak , rasonyo iyo nan maurak selo, nak maasak langkah juo sialek katampaik masiang masiang. Nan kajadi barinyo, ambo japuikkan baliak ka mamak datuak

Datuak Putiah :

(Baiyo jo nan pangka), dan mangumbalikan . Maa Malin Mudo, kok marosoklah sahabih raso, kok mangaruak lah sahabis gauang. Kini baato hanyo lai, kito lapeh juolah jo hati nan suci,jo muko nan janiah. Itulah nan kabarinyo di ambo pado Malin.

Malin Mudo :

Karano nan dijapuik alah tabao, nan dijuluak alah lareh, ambo kumbalikan kaasanyo, mak Datuak

Datuak Putiah :

Kumbalikan lah Malin.

Malin Mudo:

Maa  Sutan Sinaro, panitahan kumbali pado Sutan

Sutan Sinaro :  Lai, Malin.....



Malin Mudo :

Dimaso nan cako Sutan mananti, ambo manjapuikan nan kabarinyo kapado niniak jo mamak karajo nan bapokok, silang nan bapangka. Kok adatlah timbang bajawek, bana lah timbang balewai, pintak kami nan alun kabalaku, pintak Sutan juo baru nan kabuliah. Dilapeh juo jo hati nan suci, sarato muko nan janiah, itulah nan kabuah barinyo pado Sutan

Sutan Sinaro

Dimaso nan cako ambo mananti, Malin manjapuikan nan kabarinyo kapado niniak jo mamak  silang nan bapangka. Lah dapek nan kabarinyo, pintak buliah kandak balaku. Dilapeh juo jo hati nan suci, sarato muko nan janiah, kan baitu barinyo di Malin

Malin Mudo :

Iyo baitu bana , Sutan

Sutan Sinaro :

Karano pintak alah buliah, kandak alah balaku, basugiro malah kami lai Malin

Malin Mudo

Tantang basugiro, parundiangan bateh kito lai sutan

Sutan Sinaro :

Karano Malin alah takiro kiro, diamboalah manjadi agak-agak pulo, eloklah rundiangkito batehi (sudahi)

PIDATO PASAMBAHAN MAKAN MINUM

Pangka : Baliau datuak ......

Ujuang : Manitah lah Datuak .....

Pangka : 
Sunggueh pun Datuak surang nan hadang dengan sambah, ka rapek juo molah sagalo Datuak nan bak baranam, tuan alim nan bak baranam tarueh ka tuan ku nan ba duo. Jikok diambo indak kataratok ka tabilang, ka tasabuik namo ka tapuji gala, melainkan sambah ambo sambah data. Sambah ambo sambah data dari pangka taruih ka ujuang dari tangah lalu ka tapi, nan salirik bandue di tapi nan salerong bandue di tangah. Nan tasungkuk dek atok nan talingka dek dindiang nan tahambin di lantai nan saisi rumah tanggo nanko, walau di teras halaman rumah ka tampeknyo ambo mahantarkan sambah. Cancang babari balandasan, lompek babari basitumpu, sambah taunjuek bakeh Datuak mah Datuak 

Ujuang : 
Ka nan basamo kumbalinyo mah Datuak .....

Pangka : 
Itu mah sambah nan ka dipulangkan ka bakeh Datuak, Dek curiang barih dahulu, dek andai pusako lamo. Kalau basiang di nan tumbueh, jikok manimbang di nan ado. Tumbueh sarupo iko kini,

Bungo dadok daunnyo leba
Rumah gadang sambilan ruang
Patah timah atoknyo ijuek
Rumah si banto nak rang palangki
Duduek baselo ateh kasue
Jatueh tasisik umbuk pua
Kaladi tumbueh di samak

Dek niek silang nan bapangka
Karajo baiek nan bapokok karakok nan bajunjuang
Nan mambari aie nan bak saraguek
Mambari nasi nan bak sasuok
Sarato pangacok lamak manik
Lah masak pulo hidangan di dapue
Lah tahidang di ateh meja
Lah patuik ko lah kito palamak

Pitua juo molah ambo ka di bari ko mah Datuak .......

Ujuang : 
Lah ukue sampai Datuak ....

Pangka : 
Bilang Sakiro itu lah Datuak ....

Ujuang : 
Iyo pulo tumah sampanjang panitahan Datuak tadi
Balaie biduek di muaro
Balabueh lalu ka subarang
Biduek nan dari tangah pasa
Nagkodo banamo sari ramo
Elok sabuang dek juaro
Elok alek dek si rajo janang
Adek alek bak kato sipangka
Kami di ujuang ka manuruti sajo mah Datuak ......

Pangka : 
Lah ukue sampai Datuak ....

Ujuang : 
Bilang Sakiro itu lah Datuak ....

Pangka : 
Indak lai do dek Datuak, lah baitu bana kato Datuak, urak simpueh bukak lah selo, bakisa tagak adok ka meja makan. Tapi lai nan ka di banakan juo ka bakeh Datuak, satantang diri kito baduo, nan manjadi titien aie polongan asok, uleh kato sambuangan lidah, di ateh kato nan tadoroang dalam rundiang nan tagawa, mamintak rila jo maaf kito ka rang banyak, dek janjian di tangan Alloh, kok lai umue samo panjang, lain maso lain wakatu basuo baliek. Barila-rila kito di siko mah Datuak .....

Ujuang : 
Ditutuik rundiangan singgo iko, disudahi sajo jo Assalamu’alaikum Wr. Wb.

Basamo : 
Wa’alaikum salam Wr. Wb.

Mako janang mambao urang manuju arah meja makan untuk makan basamo-samo.

PIDATO DUKA CITA

Assalamualaikum Wr.Wb.
Alhamdulilah wasyukrulilah wani’matilah, la haula wala quwwata illa billah, washolatu wassalamu ‘ala rosulillah Muhammad ibnu abdillah amma ba’dah,
Bapak bapak, ibu ibu, saudara saudara yang terhormat!
Perkenankan kami atas nama sekalian yang hadir pada kesempatan ini menyampaikan ikut berduka cita yang sedalam dalamnya atas mala petaka dan bencana yang telah menimpa keluarga saudara………yaitu berkenaan dengan kemangkatan ayahanda yang tercinta dari saudara……..
Lebih lanjut kami ikut memanjatkan do’a kehadirat Illahi, semoga arwah beliau mendapat tempat yang layak disisi Allah Swt, serta mendapat rohmat ampunan atas segala dosa-dosanya.
Pada keluarga almarhumah yang ditinggalkan, kami do’akan semoga senantiasa dilimpahi keteguhan iman serta kesabaran dan ketabahan dalam menghadapi mala petaka ini, juga hidayah dan kebahaiaan serta taufiq dari pada Allah Swt selalu meliputinya.













PIDATO MANYIRAK BAREH KUNYIK
Assalamu'alaikum 
Kami manyapo marapulai tibo 
Bismillah mulo disabuik 
Alhamdulillah mairiangi 
Jo bareh kuniang kami manyambuik 
Tandonyo sajuak di dalam hati 
Sarancak iko malah ladang 
Lalang sahalai tak basuo 
Sarancak iko urang nan datang 
Gamang lah kami nak manyapo 
Cubadak di tangah laman 
Dijuluak jo ampu kaki 
Usah lamo tagak di laman 
Iko cibuak basuahlah kaki 
Urang Matua manjua lapiak 
Badagang inyo ka Ampek Angkek 
Kok mandua mintak ditampiak 
Kok janjang iyo mintak ditingkek 
Pantun-pantun Batagua 
(menegur sapa calon mempelai pria yang baru datang) 
Pantun-pantun ini biasanya diucapkan oleh perempuan tua yang menyambut kedatangan calon pengantin pria ditangga
sebelum naik ke atas rumah calon pengantin wanita untuk melangsungkan acara akad nikah. Diucapkan sambil menaburkan beras kuning


PIDATO  RUMAH GADANG KOTO PILIANG
Rumah gadang sambilan ruang,
salanja kudo balari, sapakiak budak maimbau,
sajariah kubin malayang. 
Gonjongnyo rabuang mambasuik, 
antiang-antiangnyo disemba alang.

Parabuangnyo si ula gerang, 
batatah timah putiah, 
barasuak tareh limpato, 
Cucurannyo alang babega, 
saga tasusun bak bada mudiak.

Parannyo si ula gerang batata aia ameh, 
Salo-manyalo aia perak. 
Jariaunyo puyuah balari, 
indah sungguah dipandang mato, 
tagamba dalam sanubari. 

Dindiang ari dilanja paneh. 
Tiang panjang si maharajo lelo, 
tiang pangiriang mantari dalapan, 
tiang dalapan, tiang tapi panagua jamu, 
tiang dalam puti bakabuang. 

Ukiran tonggak jadi ukuran, 
batatah aia ameh, 
disapuah jo tanah kawi, 
kamilau mato mamandang. 
dama tirih bintang kemarau. 
Batu tala pakan camin talayang. 
cibuak mariau baru sudah. 
Pananjua parian bapantua.

Halaman kasiak tabantang, 
pasia lumek bagai ditintiang.
Pakarangan bapaga hiduik, 
pudiang ameh paga lua, 
pudiang perak paga dalam, 
batang kamuniang pautan kudo,
Lasuangnyo batu balariak, 
alunyo linpato Bulek, 
limau manih sandarannyo. 

Gadih manumbuak jolong gadang, 
ayam mancangkua jolong turun, 
lah kanyang baru disiuahkan, 
Jo panggalan sirantiah dolai, 
ujuangnyo dibari bajambua suto. 
ado pulo bakolam ikan, 
aianyo bagai mato kuciang, 
lumpua tido lumuikpun tido, 
ikan sapek babayangan, 
ikan gariang jinak-jinak, 
ikan puyu barandai ameh. 

Rangkiangnyo tujuah sajaja, 
di tangah si tinjau lauik,panjapuik dagang lalu, 
paninjau pancalang masuak, 
di kanan si bayau bayau, 
lumbuang makan patang pagi, 
di kiri si tangguang lapa, 
tampek si miskin salang tenggang, 
panolong urang kampuang 
di musim lapa gantuang tungku, 
lumbuang Kaciak salo nanyalo, 
tampek manyimpan padi abuan. 

PIDATO RUMAH GADANG BODI CANIAGO
Rumah gadang sambilan ruang,
salanja kudo balari, sapakiak budak maimbau,
sajariah kubin malayang. 
Gonjongnyo rabuang mambasuik, 
antiang-antiangnyo disemba alang.

Parabuangnyo si ula gerang, 
batatah timah putiah, 
barasuak tareh limpato, 
Cucurannyo alang babega, 
saga tasusun bak bada mudiak.

Parannyo si ula gerang batata aia ameh, 
Salo-manyalo aia perak. 
Jariaunyo puyuah balari, 
indah sungguah dipandang mato, 
tagamba dalam sanubari. 

Dindiang ari dilanja paneh. 
Tiang panjang si maharajo lelo, 
tiang pangiriang mantari dalapan, 
tiang dalapan, tiang tapi panagua jamu, 
tiang dalam puti bakabuang. 

Ukiran tonggak jadi ukuran, 
batatah aia ameh, 
disapuah jo tanah kawi, 
kamilau mato mamandang. 
dama tirih bintang kemarau. 
Batu tala pakan camin talayang. 
cibuak mariau baru sudah. 
Pananjua parian bapantua.

Halaman kasiak tabantang, 
pasia lumek bagai ditintiang.
Pakarangan bapaga hiduik, 
pudiang ameh paga lua, 
pudiang perak paga dalam, 
batang kamuniang pautan kudo,
Lasuangnyo batu balariak, 
alunyo linpato Bulek, 
limau manih sandarannyo. 

Gadih manumbuak jolong gadang, 
ayam mancangkua jolong turun, 
lah kanyang baru disiuahkan, 
Jo panggalan sirantiah dolai, 
ujuangnyo dibari bajambua suto. 
ado pulo bakolam ikan, 
aianyo bagai mato kuciang, 
lumpua tido lumuikpun tido, 
ikan sapek babayangan, 
ikan gariang jinak-jinak, 
ikan puyu barandai ameh. 

Rangkiangnyo tujuah sajaja, 
di tangah si tinjau lauik,panjapuik dagang lalu, 
paninjau pancalang masuak, 
di kanan si bayau bayau, 
lumbuang makan patang pagi, 
di kiri si tangguang lapa, 
tampek si miskin salang tenggang, 
panolong urang kampuang 
di musim lapa gantuang tungku, 
lumbuang Kaciak salo nanyalo, 
tampek manyimpan padi abuan.